Riddym Ravings
(the mad woman’s poem)
De fus time dem kar me go a Bellevue
was fi di dactar an de lanlord aperate
an tek de radio outa mi head
troo dem sieze the bed
weh did a gi mi cancer
an mek mi talk to nobady
ah di same night wen dem trow mi out fi no pay de rent
mi haffi sleep outa door wid de Channel One riddym box
an de DJ fly up eena mi head
mi hear im a play seh
Eh, Eh,
No feel no way
Town is a place dat ah really kean stay
Dem kudda – ribbit mi han
Eh – ribbit mi toe
Mi waan go a country go look mango
fah wen hungry mek King St pavement
bubble an dally in front a mi yeye
an mi foot start wanda falla fly
to de garbage pan eena de chinaman backlat
dem nearly chap aff mi hand eena de butcha shap
fi de piece a ratten poke
ah de same time de mawga gal in front a mi
drap de laas piece a ripe banana
an mi – ben dung – pick i up – an nyam i
a dat time dem grab mi an kar mi back a Bellevue
dis time de dactar an de landlord aperate
an tek de radio plug outa mi head
den sen mi out, seeh mi alright
but – as ah ketch back outa street
ah push een back de plug
an ah hear mi DJ still a play, seh
Eh, Eh,
no feel no way
town is a place dat ah really kean stay
dem kudda – ribbit me han
eh – ribbit me toe
mi waan go a country go look mango
[.
The article An ode to dub poetry pioneer Jean Binta Breeze appeared first on Stabroek News.
